Sagot :
1. Nakatuon ang pag-iisip sa layunin
Ang mga kilalang negosyante ay laging nakatuon ang pag-iisip sa kanilang layunin. Lagi silang abala sa mga bagay o aktibidad na sa tingin nila ay makakatulong sa paglago ng kanilang negosyo.
Ang oras nila ay nakalaan lamang sa mahahalagang bagay tulad ng pamilya, kalusugan at negosyo. Mapili sila sa gamit ng kanilang oras at naniniwala sila na mas higit ang oras kaysa sa pera. Ang oras ay nauubos kasalungat ng pera.
2. Marunong makisimpatiya at may malasakit sa iba
Ang pagkakaroon ng simpatiya at malasakit sa iba ang nagbibigay oportunidad sa kanila paano maaaring makapagbigay serbisyo o makatulong sa paghihirap ng marami. Ang mga ganitong pagkakataon ay kadalasang nagbibigay daan sa pagsilang ng mga bago at malikhaing produkto o serbisyo. Ika nga, para kumita ng milyon, kailangan mo rin bigyan ng tulong o serbisyo ang milyong katao. Kaya sinasabi na ang halaga ng kita ay may direktang kinalaman sa lawak ng taong iyong natulungan o naserbisyohan.
Higit sa lahat tandaan na ang tagumpay ng negosyo ay nakasalalay kung gaano kahalaga ang kayang ibahagi nito sa tao. Dahil ang pagtangkilik sa isang produkto o serbisyo ay nakadepende sa kayang idulot na pagbabago sa pamumuhay o binibigay na kasiyahan sa tao.
3. Takot hindi umaksyon at harapin ang problema
Ang takot nila ay hindi nagmumula sa takot na magkamali. Bagkus mas takot sila hindi bigyan ng aksyon at harapin ang problema.
Para sa kanila, mas mainam na pagdaanan ang isang pagkakamali kaysa hayaan lamang ang problema at umasa ng magandang kahihinatnan. Dahil alam nila, maraming maaaring baunin na aral sa mga maling karanasan. Kumbaga, hindi ka talaga nagkamali, ika’y natuto lamang.
4. Malakas ang loob sumubok ng bago o kakaiba
Sila ay may lakas at tibay ng loob na sumubok ng bago o kakaibang negosyo. Ngunit bago sumabak ay may sapat na kaalaman o pananaliksik. Hindi basta basta pumapasok sa isang bagay na hindi lubusang pinag-aralan.
5. May disiplina sa paghawak ng pera
Isa sa magandang katangian ng magaling na negosyante ay ang pagkakaroon ng disiplina sa paghawak ng pera. Mahigpit sa paglabas ng pera at sinisiguro na ang mga gastos sa negosyo ay talagang kinakailangan at risonable.
Hindi sila mawaldas lalo na para sa kanilang sarili bagkus lahat ng mga kita ay ilalaan sa pagpapalago ng negosyo lalo na sa unang yugto
.6. Hindi iaasa ang tagumpay ng negosyo sa iba
May kasabihan na kung may isang tao na may pinaka may malasakit na magtagumpay ang iyong negosyo, ito’y walang iba kundi ikaw.
Nauunawaan nila ang kahalagahan na hindi lubusang nakadepende sa kanila lamang ang pagpapatakbo ng negosyo. Ngunit hindi rin basta basta ipapaubaya sa iba ang pagpapasya lalo na pagdating sa mga mahahalagang desisyon na may kinalaman sa pagpapalago ng negosyo.
7. Marunong tanggapin ang kahinaan at magtiwala sa iba
Hindi ito salungat sa nabanggit na unang katangian. Hindi lahat ng magagandang katangian ay likas sa isang magaling na negosyante. Minsan ay mas mainam na ilipat ang ibang responsibilidad sa iba na mas magaling sa ganitong larangan.
Mas magiging makabuluhan ang oras ng bawat isa dahil inilalaan sa mas mahalagang gawain na may mas malaking epekto sa negosyo. At mas mabilis din matapos ang isang trabaho dahil mas bihasa at gamay nila ang isang naturang gawain. Ang pangkaraniwang gawain na inilipat sa iba ay kadalasang mga maliliit na bagay na kumakain sa oras nila.
Tip: Kung nahihirapan tukuyin ang mga gawain na maaaring ipasa sa iba, mag-isip ng mga bagay na lagi mong ipagpapabukas. Marahil ito ang mga gawain na sa tingin mo ay hindi sulit sa iyong panahon o hindi ka magaling sa larangan na ito.
8. May kakayahang umangkop
Sa kabi kabilang mga pangyayari sa paligid, ang mga taong may kakayahang umangkop sa pagbabago ay lamang ng ilang hakbang sa karamihan.
9. Bukas ang isipan sa pagbabago; Mapagpakumbaba
Sila ay bukas ang isipan sa pagbabago. Hindi mananatili sa isang ideya na hindi na angkop sa kasalukuyan. Bagkus, gagawa ng paraan na ibagay sa kung ano man ang pangangailangan sa kasalukuyang panahon.
10. May matinding motibasyon sa sarili
Ang mga matagumpay na negosyante ay may matinding motibasyon sa sarili. Sila ay nagpupumilit na gawin at tapusin ang isang bagay. Ang pagnanais nila na maging matagumpay ay hindi nagmumula sa ibang tao, kung di sa kanilang sariling hangarin.
Patuloy sila na babangon hanggang makamit ang kanilang hangarin. Magkaroon man ng mga balakid sa daan, hindi ito magiging dahilan upang sila ay tumigil sa pag-abot ng kanilang pangarap.
11. Hindi natitinag sa mga paninira
Hindi sila nagpapatinag sa mga paninira ng mga tao sa paligid nila.