Alam Mo Ba? Libo-libong pamilya ang napipilitang lumikas mula sa kanilang panirahan sa ilang bahagi ng Mindanao dahil sa digmaan o kaguluhan doon. Ayon sa ulat ng Komisyon ng Karapatang pantao noong Mayo 2015 tinatayang humigit-kumulang sa 220,000 katao ang nawalan ng tirahan mula noong Enero 2015 dahil sa nangyaring sagupaan sa pagitan ng tropa ng gobyerno at ng grupo ng mga rebelde sa mga lalawigan ng Maguindanao at North Cotabato. Ang mga nagsilikas ay napipilitang manatili at mamumuhay sa masisikip na pansamantalang tirahang itinatalaga para sa kanila ng pamahalaan. Ang iba namang may kakayahang pinansiyal, labag man sa kanilang kalooban, ay nakapangingibang-bayan. Sa mga pangyayaring tulad nito ay sinasabing ang kababaihan, kabataan, at ang mahihirap ang higit na naaapektuhan. Mahirap ang buhay sa mga pansamantalang tirahan. Masikip, magulo, at walang pribadong lugar na magagalawan kung kaya't apektado ang kanilang kalusugan at seguridad. Mahirap at malungkot din ang buhay ng mga nangingibang-bayan lalo na kung malakas ang diskriminasyon sa kanilang bayang nilipatan. 1. Ano ang pangunahing pinag-usapan ng tekstong pang-impormasyon mula sa itaas?
