Gawain 1. Ihanay Mo Ako! Basahin at unawaing mabuti ang mga sitwasyon. Tukuyin kung alin sa sumusunod na sitwasyon ang nagpapakita ng pagkakaroon o kawalan ng bukas na komunikasyon sa pamilya o sa lipunan. Isulat ang sagot sa sagutang papel. Mga Sitwasyon: A. Hindi nagpansinan ang magkaibigang Kareyl at Cyrel dahil sa mensaheng ipinaabot ng kaklase kay Kareyl na nagsasabing, “Kareyl alam mo bang pinagloloko ka lang ng tinuturing mong kaibigan. Sinisiraan ka niya kapag hindi kayo magkasama. Dati nga sinabi niya sa akin na mukha kang pera kaya nakipaglapit ka sa kanya tapos mahilig kang gumamit ng mga bagay na hindi sa iyo.” B. Pasigaw na nagtatalo ang mag-asawang Ian at Lea dahil sa magkaibang paraan ng pagdidisiplina nila sa anak. Dumating pa sa puntong may mga masasakit na salita ang binibitawan. Sa huli ay parehong nagsasabing, "Hindi solusyon ang pagtatalong ito kung hindi tayo magkakasundo sa iisang bagay. Ang kapakanan ng ating anak ang pinag-uusapan, nararapat lang mauwi ang usapang ito para sa kanya.” C. Habang kumakain ay nagkukwentuhan ang mag-anak tungkol sa mga bagay na ginawa nila buong araw, nang sa kalagitnaan ng pag-uusap ay biglang napatigil sa pagkain ang isang anak, tumayo ito at humakbang papasok sa kanyang silid. Nagalit ang ama dahil sa ginawa nito. Pilit niya itong pinaupo pabalik sa hapag kainan ngunit hindi lang ito kumibo. Mas lalong nagalit ang ama na dahilan ng pagkapalo nito sa kanya at tahimik siyang lumuha. D. Tumawag si Mark sa kanyang asawang nasa Pilipinas upang linawin ang mga isyung kaniyang narinig tungkol sa pangangaliwa ng asawa at pagkakaroon ng anak sa ibang lalaki. Natakot siyang malaman na totoo ang isyu bagama't mas nangibabaw ang takot na baka masira ang kanilang relasyon dahil sa paniniwala sa walang katotohanang isyu at pagdududa na maaaring humantong sa pagkawala ng kanyang tiwala. Habang nagsasalita si Mark ay tahimik lang na nakikinig ang asawa sa kabilang linya pagkatapos ay sinabing,” Bahagya akong nalungkot sa mga narinig ko bagama't malaki ang aking pasasalamat na tinanong mo ako bago mo pinaniniwalaan ang sabi-sabi ng ibang tao. Wala akong iba at matiyaga akong naghihintay sa iyong pagbabalik. Mahal na mahal kita, iyan ang totoo." E. Nagtatalo ang magkapatid na Cian, Carl, Cheryl at Charlyn sa pag-uusap nila sa video call tungkol sa sitwasyon ng kanilang ina na nangangailangan ng pag-aaruga dahil sa sakit na iniinda. Sa kabila ng pagtatalo ay nagplano silang lahat na umuwi na lang muna sa Pilipinas at doon na pag-uusapan ang maaaring gawin para sa ina na hindi naman mahihirapan ang kani-kanilang mga pamilya. F. Sinasarili ng mag-asawang Joseph at Josefa ang problema tungkol sa pera. Hindi na nila kayang tustusan ang ibang pangangailangan ng anak sa kabila ng kanilang pagsisikap na maibigay ito. Nahihiya silang aminin sa anak na hindi pa muna nila maipagbili ng bagong cellphone at damit. Hiningi lang din ito ng anak sa pagbabakasakaling walang problema ang magulang sapagkat hindi rin naman nila pansin na nahihirapan na ang mga ito dahil ni minsan ay hindi sila tinanggihan nito. Kawalan ng bukas na Komunikasyon Pagkakaroon ng bukas na Komunikasyon
